創業起義|想去英國創業或移民?可找這個有心人(尹思哲)

Extract from Apple Daily Column - investMAN, Dec 19, 2020

今日想講下鬼哥,唔係台灣藝人黃鴻升,而係一位香港創辦人朋友。

鬼哥四十出頭,早年銀行IT出身,跟住轉型Sales,專做資訊科技系統,由於戰績彪炳,唔使10年升做上市公司高層。

最近幾年,佢連環創業,包括老本行企業IT Solution、電商SaaS平台,甚至英國房地產發展商都做埋。

認識鬼哥,係由智庫飯局開始。以我所知,鬼哥家勢都算根正苗紅,就算留係香港都係屈機嗰隻,但佢偏偏想移民。

鬼哥份人好叛逆,或者叫嚮往自由啦,平時開口埋口,都提醒我地啲朋友,要小心留意啲咩咩咩(太敏感唔寫得)。

鬼哥近年代表作,係集合咗班專業人士,用唔到200萬,喺英國Newport投咗個古堡,然後再用咗2000萬翻新,發展成幾十個單位嘅樓盤,一來一回賺咗成幾千個。

此外,佢又搞咗壇tech startup,以SaaS嘅商業模式,用一個相宜價錢幫啲想做電商嘅香港人,以我所知,最近搞飲食那位黃絲才女,都轉咗用鬼哥嘅產品。

我問鬼哥,坊間咁多SaaS平台,真係多你一檔唔多,少你一檔唔少,你初創又冇人識,因咩事要幫襯你?

「坊間嗰啲得個殼㗎咋,你估搞電商真係起個website就完事咩,哈哈!」鬼哥咁講。

「咁粗粗地用住先,嗰系統flexible,自己one man band設定埋都得,lean startups吖嘛,有咩唔好先?」我份人衰在咩都要lean。

「如果你強項喺做管理,管得掂生意,管得掂自己,lean冇問題㗎喎。問題係,好多電商創辦人,最叻係自己熟悉嗰辮,而唔係營運生意吖嘛。知唔知flexible嘅另一面係咩?唔得scalable囉!你檔生意想唔想大先?」鬼哥優點之一,係佢講嘢好鬼有耐性。

簡單嚟講,坊間SaaS電商平台,任務係幫你起個店面,即係「面個浸」。至於鬼哥套電商SaaS,強項係幫你實際經營,即係「底個浸」,咁生意做唔做得大,續航力夠唔夠,好明顯梗係底個浸緊要得多。

再講得白啲,鬼哥係將佢多年以嚟,將上市公司制度化優點,包括係採購、庫存、會計、定價、營銷等唔同範疇,再加埋自己營商經驗,點樣確立同維繫公司文化、有效遙距管理經營嘅功力,放晒入佢個產品入面,諗落其實都幾「英國佬」 — 凡事用制度去解決問題。

經營上市公司係生意,經營NBA球會係生意,經營電商都係生意,喺原理上係通嘅。例如下季主打邊啲貨、該入幾多貨、要賣俾邊個、應該賣幾錢、 discount 可以俾幾多,其實通通都係科學,全部有數得計,十足十係moneyball approach。

當然,重點要收集同整合到每個環節嘅經營數據,你至有得玩數據科學。鬼哥檔SaaS生意,就係做呢啲嘢。佢另一個屈機位,係鬼哥嘅拍檔,喺全英最大餐飲業POS公司嘅創辦人,掌握唔少當地經濟數據。

鬼哥係有心人,如果大家諗住移民英國,無論你想創業揾工定揾屋都好,揾佢無錯㗎喇。

尹思哲
香港科技記者,寫過3本書,有互聯網行業分析,亦有Startups創辦人故事。受訪者包括前Google主席Eric Schmidt、全球估值最高AI Startup商湯科技創辦人及CEO徐立等。希望透過我的工作,認識和連接更多創投圈朋友。

#presscoverage   #investMAN    #mtsoln

創業起義|想去英國創業或移民?可找這個有心人(尹思哲)
MERCURY
19 December, 2020
Share this post
Archive
Ticketing Platform for Hong Kong Drama
We are fully compliant with the GDPR laws. We promise to safeguard your data and protect your privacy rights.